СТИЛОВИ НА ПОСЛУЖУВАЊЕ ХРАНА
СТИЛОВИ НА ПОСЛУЖУВАЊЕ ХРАНА
Ако не сте навлегле подетално во оваа тема или посебно не сте се заинтересирале, сигурно никогаш нема да се сетите дека има повеќе од два вида сервирање на храна
Oд она основното што го знаете – бифе/ буфет (шведска маса) и порционо. Работејќи во оваа индустрија толку години можам да кажам дека секој од овие видови на сервирање на храна има свои предности но и недостатоци. Доколку станува збор за ресторан, видот на сервирање на храната обично зависи од стилот на ресторанот или пак од расположението на гостите, понекогаши се случува и тие самите да го менуваат сервисот, доколку тоа е возможно. А во случај кога се организираат настани, се зависи од буџетот на оној кој го организира настанот и самиот стил на истиот.
Порционо послужување (А-ла-карт) - Мислам дека нема личност која немала искуство од ваков сервис. Сите ресторани кои работат по а- ла- карт мени го имаат ова послужување на храната. Гледате во менито, нарачувате порција и ја добивате истата пред вас. Позитивните страни на овој сервис се тоа што порцијата е контролирана, нема потреба од високо обучен персонал, нема потреба од дополнителна опрема, а пак недостатоците се - веќе видено, класика од која некогаш сакате да избегате, или пак откако ќе ја донесат порцијата сфаќате дека не сте го сакале тоа јадење.
Буфет (шведска маса) – вториот најпознат сервис на храна каде позитивната страна е тоа што храната може многу убаво да се декорира и презентира, но исто така нема потреба од голем број на персонал за време на послужувањето и може да се послужи голем избор на разновидна храна која ќе го задоволи сечиј вкус. Недостатоците на овој вид сервис се тоа што не може да се контролира количеството на порцијата, па некогаш може да дојде до ситyација да се потроши повеќе отколку што е предвидено или платено.
Француски сервис - едно од поелегантните послужувања на храна каде келнерот послужува на елегантен платер-послужавник (обично сребрен) од левата страна на гостинот. Келнерот го покажува јадењето пред гостинот а тој сам се послужува. Потоа платерот се враќа во центарот на масата, ако има повеќе платери, тие сите се поставени на масата и задачата на келнерот е да ги следи гостите и нивните желби. Позитивната страна на овој сервис е тоа што гостинот може сам да си избере што сака, персоналниот сервис и комуникацијата со гостите е добар и ако персоналот е добро обучен овој сервис може да изгледа многу елегантно. Недостатоците на овој сервис се тоа што нема контрола на порцијата и послужувањето може да трае предолго, затоа што гостите не секогаш знаат каква храна е на платерот.
Aнглиски сервис - е сличен на францускиот но во овој случај келнерот го послужува гостинот, менито е веќе познато и гостите имаат само избор дали ќе јадат или не. Пример, ако се служи главно јадење (месо) со гарнир и сос, еден келнер ќе послужи месо, втор келнер ќе сервира гарнир и трет келнер ќе понуди сос. Платерите не се оставаат на маса, туку се враќаат во куjна. Позитивната страна на овој сервис е тоа што порцијата е контролирана, послужувањето оди брзо ако келнерите се добро обучени и секако добиената доза на елеганција е она што треба да се додаде. Недостатоците ги нема многу, може само да се каже дека платерите дефинитивно не смеат да бидат евтини.
Гиредон сервис (gueridon service). Најголемата позитивна страна на овој сервис е шоyто кое келнерот го прави за гостите, порциите се контролираат, а храната може да се задржи топла подолго време. Недостатоците се, што за да се воведе овој сервис е потребна скапа опрема и добро професионално обучување на персоналот. Поради специфичноста на овој сервис се троши многу време и е потребен голем број на персонал. Многу ресторани го користат овој сервис само како вид на шоy кое може да биде доста скапо за гостите, но затоа се исплати.
Тролеј (сервис на колички) - ретко се наоѓаат ресторани каде сервисот е целосно на колички, но во многу ресторани може да се види тролеj сервис на десертот, на скапите сирења и пијалоци. Во овој стил на сервис готовата храна се поставува на елегантни колички и келнерот оди до секоја маса понудувајќи и објаснувајќи што е поставено на тролејот. Позитивната страна на овој сервис е тоа што гостите можат веднаш да изберат и да бидат послужени без чекање, изгледа привлечно ако е убаво презентирано и е несекојдневно. Недостатоците се зависни од културата на народот односно некаде овој сервис функционира а некаде не.
Денес модернизацијата и технологијата носат уште многу други различни видови на сервис кои можат да се сретнат низ светот и при тоа стилот на сервисот го одредува самиот ресторан, гостите или пак културата на еден народ. Некои од овие видови на послужување ќе ги сретнете под другиимиња, како на пример порционото се нарекува и уште Американски стил. Буфет или кај нас подобро познато како Шведска маса може да го слушнете како кафетерија стил или самопослужување.Францускиот сервис може да го сретнете како сребрен сервис. Кој и сервис да се одбере за послужување на храната најважно е храната да е вкусна а персоналот да знае да ја сервира.
